Arnarfjörður

Karlakaffi 26.04.2014

Aprílkaffi Bíldudalskalla 2014

Í sannkallaðri vorblíðu, laugardaginn 26. apríl 2014, hittust Bíldudalskalla á Sjómynjasafninu Víkinni. Var þetta næst síðasti kaffihittingur þetta vorið.  Ákveðið var að síðasti kaffihittingur yrði laugardaginn 24. maí, þó þar væri ekki um síðasta laugardag mánaðar að ræða. Vara þetta ákveðið til að verða ekki alveg ofaní sjómannadeginum, sem er 1. júní.

Eins og oftast er um margt að tala þegar þessi hópur hittist.  Nú var Jói Gunnars með athyglisverðasta umræðuefnið, en það var gönguferð sem hann var að skipuleggja fyrir sumarið. Hann mætti hlaðinn kortum og öðrum upplýsingum til að sýna mönnum fyrirætlanir sínar.

Almennt vöktu þessi áform Jóa mikla athygli þó svolítið væri misjafnt hve djúpt menn sökktu sér í þessar fyrirætlanir.  Þessir fóru í mikla pælingar um göngutíma og útsýni af fjallatoppum.

 Jói var búinn að teikna gönguleiðina inn á kort og fór fram nokkuð ítarleg rannsókn á gönguleiðinni. Fara á af stað frá Króki í Selárdal, ganga út verdali og þaðan upp á fjallið Kóp. En það er einungis lítið brot af alri leiðinni, eins og fólk getur séð af teikningunni. Jói áformar að fara þetta um Jónsmessuna, þannig að ef einhverjir hafa hug á að skella sér í gönguna með honum, þá endilega hafið samband við hann.  Hann hafnaði því ekkert þarna að menn gætu slegist í hópinn.

Að sjálfsögðu létu þeir feðgar Marinó Finnbogason og Guðmundur sonur hans sig ekki vanta. Ég held að þeir hafi mætt á alla kaffifundi í vetur.

Menn ræddu þarna hin ýmsu málefni eða leyfðu huganum að reika um hinar endalausu víðerni alheimsins. Hvort Valdi hafi verið í huganum að leita að nýjum skrýmsalsvæðum verður ekki svarað. Óli Þórðar er líka djúpt hugsi, meðan Haukur og Pétur virðast skoða einhvert  málefeni.

Haukur vildi greinilega heyra álit Manna á einhverju sem Jóa leyst ekki meira er svo á, því hann klórar sér bara í hausnum yfir þessu, enda að hætta að vinna um næstu mánaðarmót. Kannski hafa þeir verið að ræða lífeyrismálin og þá engin furða þó Jói klóri sér í höfðinu.  Hins vegar er alveg víst að Jens og Valdimar voru ekki að ræða lífeyrismál; alla vega ekki svona í beinum skilningi. Kannski verið að velta fyrir sér væntanlegum framtíðarhagnaði, sem jú líka er lífeyrir þeirra sem eiga fyrirtæki.

   

Ingvi var þarna að ræða einhver mál við Guðmund formann, en hann var greinilega búinn að koma auga á mann sem var líkt og farfuglarnir okkar ánægjulegur vorboði, kominn austan yfir haf að líta á fósturlandið og æskustöðvarnar.  Var þetta meistari Theodór Bjarnason, sem dvalið hefur um langa hríð í Danmörku.

Guðmundur náði tali af Tedda og fór vel á með þeim. Nú var hins vegar komið að heimferðartíma svo slíta varð samkomunni þó enn væri margt sem menn voru tilbúnir að ræða. Ég náði hins vegar undir lokin tali af Tedda og féllst hann á að setjast niður með mér fljótlega og segja mér ágrip af lífi sínu í Danmörku, sem ég gæti birt hér á síðunni. Það verður vonandi ekki langt að bíða eftir því viðtali.

Messa 24.04.2014

Elfar Logi, Barnaleikritið HALLA

Kómedíuleikhús Elfars Loga Hannessonar

 sýnir í Gaflaraleikhúsinu í lok apríl

 

Kómedíuleikhús Elfars Loga Hannessonar er á leið til borgarinnar í lok apríl með nýjustu leiksýningu sína. Um er að ræða barnaleikritið Halla sem er byggt á samnefndri ljóðabók vestfirska skáldsins Steins Steinarrs. Sýnt verður í Gaflaraleikhúsinu Hafnarfirði síðustu helgina í apríl. Fyrsta sýning verður laugardaginn 26. apríl kl.13 og önnur sýning daginn eftir, sunnudaginn 27. apríl einnig kl.13. Miðasala er í blússandi gangi á midi.is einnig er hægt að panta miða í miðasölusíma Gaflaraleikhússins 565 5900.

 Hugljúft og sætt ævintýri frá tíma sem var. Halla litla býr hjá afa sínum í þorpi útá landi. Það er margt sem þarf að gera í þorpi út við sjó og hvað mikið sem fiskast það fiskast aldrei nóg. Afinn sækir sjóinn enda er hann mikil aflakló og það er Halla líka. En svo gerist það einn dag að afi segir við Höllu: Þú ert ekki nógu feit. Það er mér nokkurt kappsmál að koma þér í sveit.

 

Þá tekur ævintýrið á sig ævintýralega mynd að hætti alvöru ævintýra. En allt fer þó vel á lokum. Það er Elfar Logi Hannesson sem leikur afann en finnska danslistakonan Henna-Riikka Nurmi leikur Höllu.

 

Elfar Logi Hannesson fékk eldskýrnina í leikhúsinu í Baldurshaga á Bíldudal. Sex ára að aldri lék hann Grýlu strák þar sem Grýluna sjálfa lék stórleikarinn Örn Gíslason. Sagan segir að pilturinn hafi þurft að kyngja slatta af mold sem Grýla skóf úr potti sínum. Eftir það hefur fátt komið Elfari Loga á óvart í leikhúsinu. Næstu árin hélt Elfar Logi áfram að leika með Leikfélaginu Baldri á Bíldudal sem var í raun hans stærsti leiklistarskóli. Enda engir aukvissar sem stóðu á sviðsbrún Baldurs á þessum árum áðurnefndur Örn bróðir hans Ágúst Gíslason, Jón Rúnar Gunnarsson, Þuríður Sigmundsdóttir, Ottó Valdimarsson og síðast en ekki síst Hannes Friðriksson.

 

 

Baldur, páskavíka 2014. 17.04.

               Ferðir Baldurs um páskana

Vesturbyggð 17.04.2014

Frétt frá Vesturbyggð

187. fundur skipulags- og byggingarnefndar 16.04.2014

1312022 -  Deiliskipulag - Iðnaðarsvæði nyrst á Bíldudal.

Þann 20. desember 2013 samþykkti bæjarstjórn Vesturbyggðar að auglýsa tillögu að deiliskipulagi vegna iðnaðarsvæðis nyrst á Bíldudal. Tillagan var auglýst frá 30.janúar 2014 til 14.mars 2014. Frestur til að skila inn athugasemdum var til og með 14.mars 2014. Umsagir bárust frá Vegagerðinni, Umhverfisstofnun, Heilbrigðiseftirliti Vestfjarða, Samgöngustofu og Veðurstofunni. Athugasemdir bárust frá húseigenda við Lönguhlíð á Bíldudal. Athugasemdirnar beinast helst að hljóð og sjónmengun. 

Skipulags- og byggingarnefnd felur skipulagsfulltrúa að svara athugasemdum í samræmi við umræður á fundinum og felur honum að koma á framfæri lagfæringum í greinagerð. Skipulags- og byggingarnefnd samþykkir tillöguna og felur skipulagsfulltrúa hana til fullnaðarafgreiðslu samkvæmt 42. greinar skipulagslaga nr.123/2010.

Glærur frá íbúafundi 2. apríl 2014

Glærur...

Meira...

Frá íbúafundi 2. apríl 2014

Frá íbúafundi á Bíldudal 2. apríl 2014

fréttaágrip frá Byggðastofnun

Miðvikudagskvöldið 2. apríl s.l. var haldinn vel sóttur og skemmtilegur íbúafundur á Bíldudal þar sem farið var yfir stöðu mála í verkefninu „Bíldudalur – samtal um framtíðina“. Hér að neðan er útdráttur úr fréttatilkynningu um fundinn:

Búið er að endurvekja skógræktarfélag og stofna handverkshóp og ýmislegt er á döfinni í ferðaþjónustu.  Þá munu Vesturbyggð og Tálknafjarðarhreppur í samstarfi við íþróttafélögin á svæðinu, ráða íþrótta- og æskulýðsfulltrúa.  Unnið er úr hugmyndum um endurbætur á tjaldsvæði í samstarfi Vesturbyggðar og áhugahóps og undirbúningur er hafinn vegna fjölgunar áningarstaða við þjóðveginn.  Í nýsköpunarkeppni AtVest á grundvelli sóknaráætlunar, kom fjórða sæti í hlut margmiðlunarverkefnis um Ævintýralandið Bíldalíu.  Brottfluttir Bílddælingar hafa um langt skeið tekið virkan þátt í framfaraverkefnum á Bíldudal og leggja þannig sínum gamla bæ lið.  Bæjarhátíðin Bíldudals grænar baunir hefur verið á könnu brottfluttra, en nú er unnið að stofnun félags og unnið úr hugmyndum íbúaþings um hátíðina.   

Á íbúafundinn mættu m.a. svæðisstjóri og deildarstjóri umsjónardeildar Vestursvæðis frá Vegagerðinni og gerðu grein fyrir forgangsröðun vegaframkvæmda og -viðhalds á svæðinu og tóku þátt í umræðum um samgöngumál.  Fulltrúar verkefnisstjórnar hafa fundað með þingmönnum kjördæmisins, til að koma skilaboðum íbúaþings á framfæri.  Verkefnisstjórnin mun nú starfa áfram í eitt ár og fylgja verkefnum eftir.  Þar má m.a. nefna þá hugmynd að gera fyrirtækjum á landsbyggðinni kleift að gefa starfsmönnum auka frídaga til að sækja þjónustu.  Í ljósi vaxandi samþjöppunar þjónustu á höfuðborgarsvæðinu, ekki síst heilbrigðisþjónustu, gæti þetta orðið mikilvægur þáttur í að bæta búsetuskilyrði.  Á fundinum kom m.a. fram að Fjórðungssamband Vestfirðinga er þátttakandi í norrænu verkefni, sem verið er að ýta úr vör.  Vinnuheiti þess er „Mannfjöldabreytingar og fólksfækkun – áhrif þess á efnahag og atvinnulíf“. Í haust verður haldið byggðaþing á Patreksfirði í samstarfi Háskólaseturs Vestfjarða og Byggðastofnunar og verður efni þess að hluta til tengt hinu norræna verkefni sem Fjórðungssambandið er aðili að. 

Á Bíldudal eru uppi áform um töluverða uppbyggingu tengda laxeldi sem hefur áhrif á viðfangsefnin sem við blasa, s.s. byggingu íbúðarhúsnæðis, skipulagsmál, umferðaröryggi og aðstöðu fyrir fyrirtæki.  Íbúar binda vonir við að af uppbyggingunni verði, en telja jafnframt mikilvægt að standa vörð um kosti þorpsins.  Það fjöregg er í höndum heimamanna og þeir vinna markvisst að því að þétta samfélagið.  Vesturbyggð mun á næstunni gefa íbúum kost á að koma að ákvörðun um hvernig tveimur milljónum af framkvæmdafé verður ráðstafað og haldin eru íbúakaffi reglulega sem þéttir samfélagið og skilar jákvæðri gerjun. 

Myndir frá fundinum eru inn á MYNDIR